الثلاثاء، 24 يوليو 2012

مجالات العمل للقسم ميكانيكا باور

مجالات العمل لقسم ميكانيكا بور


1/ محطات توليد الكهرباء
ودى تعتبر من أهم المجالات اللى هتسمع عنها وإنت بتدرس فى ميكانيكا قوى
ميكانيكا قوى .. يعنى توليد الكهرباء
كهرباء قوى .. يعنى نقل وتوزيع الكهرباء
ودة عشان بس نفهم الاختلاف بين عمل مهندس ميكانيكا قوى وكهرباء قوى فى المحطات بتاعة توليد الكهرباء
2/ التكييف والتبريد
ودة بيسموة حاليا المجال المربح
يعنى اللى بيقدر يثبت وجودة فى هذا المجال حاليا بتتهافت عليه الشركات والمكاتب الكبيرة فى مصر وخارجها طبعا خاصة دول الخليج العربى
والموضوع بتاع التكييف والتبريد لا يقتصر على التكييفات المنزلية اللى بنشوفها
لا فى تطبيق أكبر من كدة بكتير إسمة " التكييف المركزى " ودة بيكون نظام تكييف لمنشأة كبيرة زى مستشفى أو فندق أو قرية سياحية.. الخ .. تكلفتة عالية جدا لكنها فى كل الاحوال أفضل من التكييفات العادية وأسهل فى الصيانة وزى ما وضحت بيستخدم فقط فى المنشآت الضخمة اللى بتحتاج تكييف وتبريد فى كل غرفة أوفى كل جزء منها
3/ السيارات
واحد هيقولى طب ما فى كليات هندسة تانية فيها قسم السيارات لوحدة
أوك ماشى .. بس كدراسة فى قسم ميكانيكا قوى إنت تقدر تزود عليها على حسب رغبتك وتكون جدير انك تشتغل فى المجال دة إذا أردت فعلا
وهو مجال مميز جدا طبعا وبدورة بيودينا لمجال محركات الطائرات ومحركات السفن والمعدات الثقيلة عموما زى .. الحفارات و اللوادر والاوناش بكل أنواعهم
4/ البترول والغاز الطبيعى
بردة واحد هيقولى البترول والتعدين دول ليهم كليه منفصلة فى السويس وهما هيكونوا أكفأ من بتوع ميكانيكا قوى
بردة هقولة الاحتياجات بتفرض نفسها على الكل
محطات البترول والغاز الطبيعى عادة كلها عبارة عن حفر فى الارض واستخدام طلمبات واستخدام حفارات وعمل شبكة مواسير و .. و ..
خد بالك طالما ذكرت كلمة " طلمبة " اعرف انك فى أرض ميكانيكا قوى
وكذلك كلمة " شبكة مواسير "
يعنى الموضوع متوقف على مهارة المهندس نفسة وهل هو عندة الاستعداد فعلا يتعلم فى المجال دة ويمشى فيه ولا لا ومهندس ميكانيكا قوى فعلا قادر انة يشتغل فى المجال دة
5/ محطات تحلية المياة ومحطات الرفع بجانب المشروعات الزراعية الكبيرة
وبردة المحطات دى بتستخدم الطلمبات كعنصر أساسى فيها وطبعا ميكانيكا قوى ليها دور قوى جدا فى المجال دة
6/ مكافحة الحرايق
ودة مجال جديد الى حد ما وبيعتبر من المهام الرئيسية دلوقتى فى أى مشروع كبير ودة للحفاظ على المشروع ككل من أى خسائر فادحة بسبب الحرايق
وبيعتمد المجال دة على شبكة مواسير وأجهزة تحكم تعمل عند الخطر فقط طبعا
7/ الصيانة والعمل فى المصانع الانتاجيه
طبعا مفيش مصنع بيخلو من مهندس الميكانيكا والكهربا عموما
مهندس الميكانيكا طبعا يهمة جدا ان المكن يطلع أفضل انتاجية ليه وفى نفس الوقت يحافظ عليه بالصيانة الدورية السليمة
الصيانة تعتمد فى الاساس إنك تكون عارف الماكينة دى بتشتغل ازاى واية هى أجزائها ولما يحصل عطل أقدر أصلحة إزاى أو إزاى وإمتى أغير جزء تالف بجزء صالح للاستخدام
وفى كورسات خارجية على فكرة عن التزييت والتشحيم فى المكن وصيانة اغلب المعدات الميكانيكية
طيب بعد ما اتعرفنا على مجالات العمل الكتيرة دى
الموضوع تحس إنة عام .. هقولك دى ميزة وعيب فى نفس الوقت
ميزة انك ممكن تحدد انت بتحب اية وتمشى فيه بدون عوائق بإذن الله
وعيب فى حالة لما بتكون مش قادر تحدد اية المجال اللى انت عايز تمشى فيه
لان ساعتها بيبقى معاك بكالوريوس ميكانيكا قوى بس فى اية بالظبط مبيتكتبش !
بيتكتب بس المشروع اللى انت هتختارة فى آخر سنة اللى هى سنة رابعة
بس فى نقطة مهمة اوى مش عايز أنساها
الرزق يا جماعة حاجة بتاعة ربنا سبحانة وتعالى
اعمل اللى عليك وتوكل على الله وحاول تفيد أمتك وبلدك


هناك 18 تعليقًا:

  1. شكراااااااااااااااااااااااااااااااااااا.... بس ممكن مثال لمشاريع التخرج؟؟؟؟

    ردحذف
  2. شكراااااااااااااااااااااااااا جدا جدا جدا..........بس ديما يتقال ان فرص الشغل فيه للبنات ضعيفة جدا هل دا صح؟؟؟

    ردحذف
    الردود
    1. ده كلام صح لأن مجال العمل فيه متعب الى حد ما مقارنه بالاقسام التانيه

      حذف
  3. thanks very much this is so useful , gomaa muhammed

    ردحذف
  4. جزاااااااااك الله خيرا ...

    ردحذف
  5. طب انت شايف مجال الصيانه أحسن ولا التبريد والتكييف ؟

    ردحذف
  6. من الاخر صيانه

    ردحذف
  7. انا قدامي فرصتين تبريد وتكيف و صيانه محركات مش عارف اختار ايه هو المجال الافضل

    ردحذف
  8. انه من افضل واهم الاقسام في هندسة

    ردحذف
  9. ممكن اعرف القسم اللى مش فية كيمياء

    ردحذف
  10. واية افضل قسم فى ميكانيكا بور

    ردحذف
  11. شكرااااااااااااا جزيلاااااااااااا ,,, انا حبيت القسم ده اوى

    ردحذف
  12. كهربا &ميكانيكا
    ايهما افضل ؟؟

    ردحذف
  13. هو قسم ميكانيكا باور بيحتاج تقدير عشان ندخله ولا بندخله باختيارنا من غير تقدير ولامجموع في ثانية ميكانيكا

    ردحذف
  14. موجود لمكانيكا باور فرصه نكون ميعدين ف معاهد خاصه ؟

    ردحذف
  15. ايهما فضل الإنتاج ام الباور

    ردحذف
    الردود
    1. في هندسة مفيش حاجة اسمها انه افضل ،بتبقى علي حسب ميولك وقدراتك ،الأنت بتحبه وشايف أنك هتبدع فيه طبعاً هيكون الأفضل بالنسبة لك.

      حذف

Related Posts Plugin for WordPress, Blogger...