المواد الدراسية في تالتة عمارة (بالتفصيل)
المواد الدراسية في تالتة عمارة (بالتفصيل)
ثالثة عمـــــــارة ( مش صعبة لكن فيها شغل كتيرـ
الترم الأول :- 6 مواد ( تصميم معمارى - تصميمات تنفيذية - ميكانيكا التربة soil - تخطيط - تاريخ العمارة )
أولا التصميم المعمارى ... أكيد مش هعرفكوا يعنى ايه ديزين ... كلكوا عارفينه طبعا بس اللى ممكن أقوله
ان البرنامج بتاع المشروع بيبقى مش زى السنتين اللى فاتوا ورقتين وخلاص .. اللى بيحصل ان المشروع بيبقى أكبر شوية من المشاريع القديمة ودى حاجة طبيعية و موقع المشروع بيبقى محدد وبيقولكوا مكانه فين .. والمفروض تعملوا دراسة ميدانية للموقع فى البحث اللى بيتسلم أول المشروع ودة فى حالة اذا كان أرض المشروع فى القاهرة أو قريبة يعنى لكن لو بعيدة مش مهم الميدانى .. جوجل ايرث موجود ...
بيبقى فى 3 مشاريع ... أهم حاجة الحضور والتسليم كل مرة وصححوا مع المعيد أو الدكتور اللى معاكوا فى السكشن حتى لو كنتوا مش مقتنعين بيهم وصححتوا مع حد غيرهم بس عشان أعمال السنة ... يعنى ممكن تلاقى واحد عنده مشروعين كبت وامتياز وفى الاخر مش بيجيب درجة كويسة ودة اللى حصل معايا .. بسبب أعمال السنة .. وممكن تلاقى حد بيجيب جيد بس وبيحضر كل مرة وبيصحح فى السكشن بتاعه وجايب زيه أو ممكن أكتر منه كمان ....
المادة من 300 درجة ... 180 أعمـــال السنة و 120 امتحان الفاينال
ثانيا التصميمات التنفيذية :- أكتر مادة بتحتاج مجهود كبير ... طول السنة بتسلموا 6 مراحل كلك فى المشروع اللى بتاخدوه ..
المرحلة الاولى : مرحلة المساقط الافقية
المرحلة الثانية : مرحلة الواجهات والقطاعات
المرحلة الثالثة : مرحلة الموقع العام
المرحلة الرابعة : مرحلة أعمال الاضاءة والأعمال الصحية
المرحلة الخامسة : strip seection
المرحلة السادسة : مرحلة التفاصيل details
( فى أخر السنة بيتسلم المشروع كله على بعضه )
وكل سكشن بيبقى معاكوا شفافات فيها الشغل بتاعكوا واللى بتعدلوا عليه لحد ما يجى وقت تسليم الكلك ....
أعمال السنة 180 درجة بتتوزع على الحضور وتصحيح الشفافات كل مرة ... مرحلة الكلك اللى بتتسلم ... 2 امتحان ميد ترم ... المشروع لما بيتسلم على بعضه فى الأخر .... بحث و دة بيبقى مهم وبيكون عن مبنى متنفذ و ماكيت
محدش يعرف ايه عليه درجة أكتر من ايه من الطلبة وكل شوية هتلاقى حد يقول حاجة غير التانى اللى يقول الكلك عليه درجة أكتر من الشفاف واللى يقول أهم حاجة اسلم المشروع كامل فى الأخر ... بس الحقيقة أن كل حاجة فى الحاجات دى مهمة وكل حاجة بتكمل التانية ولازم نركز على كل حاجة ...
المادة اسمها تصميمات تنفيذية ...... يعنى الموضوع فيه ديزين شوية بس منركزش على الديزين وازاى نغير فى المشروع ونسيب الغرض الاساسى اللى هو التنفيذيــــة
كمان فى حاجة مهمة لازم نركز عليها ... لازم يكون المشروع كله مترتبط ببعضه يعنى المساقط مرتبطة بالساكشن مرتبطة بالواجهات والتفاصيل و كدة .. يعنى مثلا بعد ما تكون عملت البلانات وتيجى مرحلة الواجهات تلاقى ان انت عايز تعمل حاجة فى الواجهة زى مثلا سلاح ... والسلاح دة انت مش عامله فى البلان كدة المشروع مش هثيبقى مترابط .. مش معنى كدة منعملش السلاح ... لا نعمله بس نبقى نعمله كمان فى البلان
مثال تانى بردو للتوضيح ... أما تيجى مرحلة التفاصيل .. تفتكر ان انت عايز تعمل تفصيلة مافورة مثلا .. وانت مش عاملها لا فى البلان ولا فى السكشن ... طبعا لما المشروع يتسلم على بعضه فى الأخر دى هتبان ...
اللى انا عايز أقوله اننا نفكر فى المشروع كله على بعضه مش كل مرحلة وحدها يعنى فى مرحلة البلانات مش نسلم البلان من غير أى تفاصيل ... ونيجى فى مرحلة التفاصيل منلاقيش فيه حاجة نعملها ...
دكنور المادة د/ياسر لطفى .. هيدخلكوا 3 أو 4 مرات طول السنة ود/ ألفت هى اللى بتقوم بالمادة مع باقى ال stuff
المادة من 300 درجة 180 أعمال السنة و 120 امتحان الفاينال
يارب أكون قدرت أوضحلكوا الموضوع ....
ثالثا تخطيط المدن : من 150 درجة 60 أعمال السنة على الغياب و المشروع اللى انتوا هتعملوه ..
انا هتكلم عن المشروع اللى احنا اخدناه ... مش عارف انتوا هتاخدوا مشروع ايه ..
احنا اخدنا مشروع عن العشوائيات فى منطقة حلوان وازاى نحل المشكلة دى طبعا مش كل الجروبات هتنزل فى نفس المكان فبيقسموا المنطقة على الجروبات .. وكل جروب بياخد كام شارع ويعمل دراسة ميدانية عليه ويشوف ايه المشاكل اللى فى المنطقة وازاى يحلها ...
وبيبقى فى متابعات مع الدكتورة طول الترم بتتسلم و عليها درجات .
رابعا تاريخ العمارة :- من 100 درجة هتاخدوا تاريخ العمارة الاسلامية وهتعملوا زى ما كنتوا بتعملوا السنين اللى فاتت بالظبط ... مفيش جديد ... ركزوا على مرحلة التعارف لازم تبقى كويسة وبريزنتيشن كويس .... دة لو كان معاكوا
م/أحمد صالح مش عارف هيبقى هو ولا لا ....ترتيب الجروب بيفرق كتير ..
خامسا اختيارى 1 : التشكيل الفراغى أو التصميم البصرى .. الاتنين أسهل من بعض .. أنا كنت واخد تشكيل فراغى وعشان كدة هتكلم عليها أكتر أما بالنسبة للتصميم البصرى بردو هتكلم عليها من خلال اللى كنت بسمعه من الناس اللى كانوا بياخدوها
أولا التشكيل الفراغى .. وهتديهلكوا د/ راندا حسن ودى مادة بسيطة بتبقى حوالى 7 محاضرات طول الترم ...
الاول بتدرسوا فيها الاشكال الهندسية وعلاقتها ببعض وازاى بتأثر على التصميم وبعد كدة بيبقى فى محاضرات بتعرض فيها الدكتورة أمثلة متطبق فيها الكلام دة على مستوى المبانى والمناطق والشوارع و كمان هتديكوا كل المحاضرات powerpoint ومش بتهتم بالغياب أوى كمان ... والمفروض انكوا تعملوا بحث صغير عن المحاضرة طول السنة يعنى أى ورقتين تلاتة وتطبعوهم الصبح عند الأنصار ولا أرت .. وظبطوا البرزينتشين شوية ومش مهم الداتا ... هي بتحب كدة وعن خبرة ... والمفاجأة الكبرى أن اللى كان بيسلم البحث كل مرة فى ميعاده بياخد 10 ... وبيلاقى نفسه جايب الدرجة النهائية فى أعمال السنة ... لكن اللى بيسلم البحث متأخر بينقص درجة أو درجتين بالكتير يعنى بيجيب 8 أو 9
والامتحان فى المادة دى بيكون سهل جدا جدا .... أنا جبت فيها 100 من 100 و معظم الجروب بتاعى وكام حد من الدفعة كدة ... برغم ان انا مسلمتش غير أول بحث بس ... لكن انا عملت بحث تانى كان كبير و فى المادة كلها فى أخر الترم ودة مكنش مطلوب ولما وريته للدكتورة فرحت أوى وقالتلى دخل معاك جروب وزود فيه حاحات أكثر وطبعا باقى الجروبات بدأوا يعموا زينا وقعدوا يدعوا عليا عشان أنا كنت السبب مع انها مطلبتش منهم يعملوا حاجة .. .. ودة بيدل على انها طيبة وكريمة أوى فى الدرجات
طبعا عرفتوا هتختاروا ايه ...
ثانيا التصميم البصرى .. د/منى (يارب أكون قلت اسمها صح عشان مش فاكر ) معظم اللى كانوا داخلين المادة دى اللى هما بيرسموا فرى هاند كويس ... لان هما بيعملوا اسكتش طول السنة وبيرسموا وبيلونوا فيه وحاجات كدة وكل مرة بياخدوا درجة وكنت بسمع منهم ان دراستها قريبة الى حد ما من التشكيل الفراغى وجابوا بردوا درجات كويسة بس تقريبا محدش عدى 90 من 100 على عكس التشكيل ... وسمعت ان الترم التانى الدكتورة قالتلهم متزعلوش من النتيجة ( هى مكنتش وحشة .. بس بالمقارنة مع التشكيل كانت وحشة
سادسا ميكانيكا التربة والاساسات soil (د / عبد العزيز بندق ) من 100 درجة
زيها زى مواد مدنى اللى خدناها فى عمارة سواء خرساتة أو استركشر بيبقى فيها أمتحان ميد ترم و الامتحان بتاعها
بيتكرر فى السنين اللى فاتت ... وفى شيتات بتتسلم ... وعلى فكرة د / بندق دة طيب جدا وبيدى الناس كلها درجات بس هو بيحب يتظاهر سعات انه شرانى بس بتبقى مش لايقة علي.
ليست هناك تعليقات:
إرسال تعليق