مزايا الهندسة المعمارية (قسم عمارة)

مزايا قسم عمارة

1- الدراسة عندنا فى قسم عمارة بتكون فى جروبات ودى من أهم الحاجات اللى بتميز القسم يعنى انتوا من أول ما هتتدخلوا القسم هتبدأوا تعملوا مجموعات كل مجموعة بتكون 10 طلاب ودة بيفيدنا فى تبادل الخبرات مع بعض وكدة ومعظم الأبحاث بتكون جماعية يعنى للجروب كله وبتتجمعوا مع بعض وتعملوا كل الحاجات اللى هتتسلم .
2- مفيش عندنا كتب والدراسة بتعتمد على البحث العلمى يعنى هتجيب المعلومة بنفسك ودى سهلة ... النت دلوقتى مليان داتا وعندكوا مكتبة الكلية .. انا عارف يمكن مدخلتوهاش من زمان بس لازم تحاولوا تحبوها ...
3- المواد عندنا معظمهعا سهلة أو كلها تقريبا ... وتتحب يعنى ومش فيها حاجات خنيقة وكدة يعنى الحياة حلوة ... وهتشوفوا بنفسكوا ...
4- أيام الأمتحانات مفيش تعب وكدة زى باقى الأقسام يعنى مثلا لو جينا نبص للترم الأول فى أولى عمارة هنلاقى ان هما 3 مواد منهم مادة مش بتتذاكر لانها بتعتمد على خبراتك طول الترم اللى هيا الحاسب الألى يعنى بتعرف أتوكاد هتعرف تحل ... وكله بيعرف محدش يقلق .... والمادتين التانين أسس تصميم .. ودى سهلة جدا والتانية استركشر ودى بردو مش صعبة ..
5- العلاقة بين الطلبة والدكاترة بتكون قوية ودة بيرجع لان الدكتور بيبقى مع الطلبة طول السنة وبيقعد معاهم يعدلهم على التصميم بتاعهم وفى لكل سكشن دكتور فى التصميم المعمارى ...
6- العلاقة بين الطلبة مفيش أحسن منها ودى عشان روح التعاون الموجودة فى القسم ... وفى حاجة كمان بتقرب كل الطلبة من بعض ( يوم العمارة ) واليوم دة بنعمله كل سنة فى أخر الترم التانى وبنعرض فيه كل الأعمال المميزة اللى تعملت طول السنة فى المعرض الموجود فى الدور الأرضى من مبنى عمارة وبيكون موجود فيه رئيس الجامعة والعميد ورئيس القسم و بيتعمل فيه حفلة كبيرة فى المسرح ...وطبعا بيتجمع الطلبة من الأربع دفعات 1.2.3.4 عشان يحضروا للحدث العظيم دة ..
7- على مستوى العمل بعد ما بنتخرج ... مفيش حد مش بيشتغل باذن الله والارزاق دى حاجة بتاعت ربنا